2022-03-20 【東方日報】否認救收視 曾志偉出山做主持 波波得寵任嘉賓
瀏覽次數:51

無綫高層曾志偉昨日宣布回歸司儀界,領軍主持全新綜藝節目,但否認出山救收視,並自嘲節目可能因他而收視跌。早前有指無綫計劃實施閉環式管理方案,他解釋只為應對政府可能推出的禁足令,並非事在必行。

無綫總經理(節目內容營運)曾志偉相隔5年出山,夥拍錢嘉樂主持全新綜藝節目《講你都唔信》,他們昨日偕丁子朗、林秀怡、黃婧靈(波波)及莊鍶敏進行拜神儀式,影大合照時,波波站在志偉隔籬,明顯得寵。

談到節目構思,志偉表示因應政府有可能推禁足措施,故計劃閉環式拍攝,保證禁足期間亦有娛樂節目提供予市民,自己身為高層當然要以身作則留守做節目,並指有約70名同事報名:「今次呢個節目當係預演,除咗我同嘉樂係鐵腳之外,每晚都會有唔同主持,暫定拍3星期。但如果政府唔禁足,我哋都唔需要閉環。(之前傳話有8個環節?)唔止8個,諗咗好多節目。(係咪有閉環天團12人?)初時真係諗住12個人,但太多人報名。(除咗錢嘉樂,邊個係你欽點?)我做司儀為主,因為想同大家分享我咁多年做司儀嘅經驗。(之前傳雪藏嘅馮盈盈都有份做。)係我搵佢。(你喺雪櫃搵佢出嚟?)唔需要,佢之前確診,依家已經好番晒。」

林秀怡壓力大

志偉表示出山並非為救收視,一直心思思想做幕前:「之前想做番《獎門人》,但唔想被人話我又用《獎門人》去打人,今年係《獎門人》25周年,可能都會出嚟玩吓。(有收視壓力?)冇,依家收視好好,怕我出嚟做節目個收視唔好喎!」對於有指無綫共有500名員工染疫,志偉指這個數字合乎政府早前公布的確診人數比率,但承認不少劇集未能開工:「好在我哋好多存貨,啲廠會慢慢開番,但外景就做唔到。」

主持之一的林秀怡表示跟志偉及嘉樂合作有壓力,笑言想將快速測試結果由一線劃成二線。而波波穿貼身衫上陣,擔任嘉賓的她否認被志偉欽點,並指因疫情關係,有份拍攝的劇集要延期開拍。




 
其他近期報導:
2022-05-25 【大台改革】TVB藝訓班香港內地同步招生 曾志偉碌人情卡邀星級導師講課
2022-05-23 《獎門人》有罪?
2022-05-06 360秒人生課堂︱錢嘉樂憶當年主持《獎門人》似行刑
2022-04-04 披露 10 年前拍床戲辛酸 方力申被爆講大話會面紅
2022-04-04 講你都唔信︳曾志偉壓軸落場講古後輩做主持 肥仔聰記仇玩《獎門人》被針對
 
 
  木日一比 mokuSnoopy - Snoopy商品代購  


  日系山林 Mountain Forest 限定商品代購