2022-02-10 【頭條日報】頭條獨家丨Aeren Rock 蓮姐望挑戰第二季 首拍《青春本我》遇難題
瀏覽次數:279

「聲夢」Aeren(文凱婷)、Rock(何晉樂)和蓮姐(林君蓮)最近在《青春本我》初次體驗做演員,3人覺得好玩之餘,亦體會到演戲上不少難題,幸好最後順利完成挑戰。有過今次經驗,他們都想繼續有機會演戲,仲期待演繹其他角色,不過最希望《青春本我》開第二季,一班「聲夢」學員再一齊玩。

劇中同現實都是神婆的蓮姐,今次最難演是角色不能笑,「我個角色永遠都唔笑,但係其他人都係好開心,譬如有首好開心嘅歌,大家都好開心笑,但係我就唔准笑,個反差出嚟會好好笑,但係我忍笑忍得好辛苦,仲要對手戲大部份係同Felix(林智樂),見到佢鼻窿同頭髮,仲有對八字眉就想笑,好彩後尾都忍慣咗。」

對於Rock最困難要算是25歲的他,要扮中學生着校服,「梗係有難度啦!好彩我仲可以掹車邊做到,我同Chantel(姚焯菲)差10年仲可以同班,不過,我真係冇乜試過校園生活,以前喺英國讀書比較摺,好開心有今次經歷,雖然係拍戲,但好似去咗Summer School。」

同前輩演戲壓力大

劇中飾演錢嘉樂和湯盈盈囡囡的Aeren,最初知道要跟前輩合作,壓力好大,「因為唔認識,佢哋感覺有啲嚴肅,可能我以為係武打演員,打得可能惡惡哋,好擔心唔係好認識佢哋,NG時佢哋會唔會嬲,但第一次見佢哋,已經好nice咁叫我阿女,嗰吓好似已經破咗冰,當然做戲時,佢哋演技令我入返狀態,譬如湯盈盈前輩問我點解唔食藥,我畀佢震懾咗,導演NG話我太驚。」

3人有個今次拍劇經驗,都想繼續有機會嘗試演戲,蓮姐想演精神分裂角色,Rock恨演情緒波動大角色,而Aeren就想挑戰做打女,他們仲自稱是喊包,希望未來有機會發揮喊功。不過他們最想有機會《青春本我》開第二季,可以一班「聲夢」學員再合作,他們仲想好主題,「《青春本我》大學版,或者職場版加啲大學都可以。」




 
其他近期報導:
2023-02-22 【餅印父女】錢嘉樂湯盈盈細女愈大愈靚 網民稱兩姊妹各有特色:基因的奇妙
2023-02-22 【餅印父女】錢嘉樂湯盈盈細女愈大愈靚 網民稱兩姊妹各有特色:基因的奇妙
2023-02-21 湯盈盈洩蜜 錢嘉樂鐵漢柔情實錄曝光
2023-02-21 錢嘉樂湯盈盈細女愈大愈靚好嬌俏 網民比較兩姊妹嘆:基因的奇妙
2023-02-20 久未現身家庭照 錢嘉樂冧爆慈父樣望7歲細女
 
 
  木日一比 mokuSnoopy - Snoopy商品代購