2021-08-06 【東方日報】【串椒3姊妹】錢嘉樂封女神殺手 梅小惠:真識食!
瀏覽次數:2128

由昔日緋聞無數搖身一變成為「愛妻號」的藝人錢嘉樂,一亮相繽FUN星網節目《串椒3姊妹》,即被3位主持人梅小惠、江欣燕及曾華倩「公審」,力數他有「港姐殺手」之稱「殺女」無數,他則笑言現時終被「前世情人」治到,遭兩個囡囡嫌棄反而更加肉緊,直呼:「原來男人真係咁賤格」,期間大女Alyssa更突然入鏡獻吻,他即時冧爆表示:「對住佢真係冇晒辦法!」

入行逾40年的錢嘉樂武指出身,一直默默耕耘,現時更是三屆香港動作特技演員公會會長,他指早在出道初期眼見哥哥錢小豪訓練班未畢業即被睇中做男主角,已深知不是「靠樣搵食」:「錢嘉樂你都係要努力啲做嘢㗎啦,靠樣嘅係哥哥。」梅小惠即暗寸:「但估唔到你唔靠樣都搵到食」,指他相當「識食」,以往的女友包括李珊珊、李麗珍及關秀媚等,位位都是女神級,錢嘉樂即趁機澄清:「成個圈對我誤解好深,我都係一個接一個啫,我唔會漁翁撒網,同埋我唔係要專揀(港姐)冠軍,真係隨緣。唔係話『嗰個冠軍一定要追佢』,呢啲心態唔要得!」

梅小惠即解畫指他現時最愛是老婆湯盈盈及兩個女兒,又指他由浪子變成住家男,他就直認做了爸爸後修心養性:「以前真係鍾意蒲,願望係飲幾多支酒唔嘔,依家唔會啦,會諗咗屋企先,希望對住佢哋多幾年。」除減少飲酒,經常拍打戲的他亦相當注重受傷後的修復及保養,以保持強健體魄陪伴家人。而講到兩個寶貝女,他笑指被女兒嫌棄卻更加上心:「呢啲咪拍拖嘅感覺!」又指現時一屋女人,就連寵物雀都是雌性,直言「無地位」。

經典環節姊妹3揀1,「3姊妹」今集要化身「三陪女郎」,分別為「陪月」、「陪坐」、「陪返工」,錢嘉樂指曾華倩是陪月的不二之選,梅小惠笑稱:「佢冇(奶水)㗎喎!」錢嘉樂立即護航:「又唔係揀奶媽!陪月之嘛,因為佢有經驗,同埋睇到佢嘅責任心,佢個仔幾高,餵少餐都冇咁高啦。」他續指江欣燕夠健談可以「陪坐」,加上欣欣講嘢好好笑,一定好開心,而小惠則能「陪返工」:「你做嘢係掂嘅。」小惠隨即詐型:「做咩成日叫我做嘢啫?我可唔可以唔陪呀,你啲工作咁頻密。」他就笑指:「唔使陪,你直情做埋我嗰份。」

Video: https://hk.on.cc/hk/bkn/cnt/entertainment/20210806/bkn-20210806000123184-0806_00862_001.html


 
其他近期報導:
2021-12-01青春本我|Chantel被爆「NG王」 錢嘉樂孖湯盈盈首度幕前演夫妻
2021-12-01青春本我|錢嘉樂湯盈盈幕前首演夫妻
2021-12-01錢嘉樂湯盈盈首度合演夫妻 Chantel忍唔到笑被封NG王
2021-12-02青春本我|錢嘉樂湯盈盈首度合體演兩公婆 同劇仲有邊對係真‧夫妻?
2021-11-06人盯人!「閹槍」做足檢查
 
 
  木日一比 mokuSnoopy Facebook