2018-09-26 【東方日報】4大功夫Master加持!錢嘉樂做接班人壓力大

瀏覽次數:44

導演錢嘉樂與監製曾志偉在元朗為電影《黃金兄弟》舉行慰勞宴,慶祝電影在中港兩地上映數日已超過兩億三千萬人民幣。

曾志偉受訪表示:「好開心,唔係因為收咗幾多票房,票房每日都有增加,代表口碑好,口碑勝於一齊,亦都多謝佢哋五個日日跑戲院謝票,啱啱先去完元朗謝票,每次都係突擊謝票,大家嘅反應係冇諗過咁好睇,好耐冇咁好睇嘅大型港產片,港產片返嚟喇,所以每次謝票佢哋都好開心,謝完票大家就一齊去宵夜。」講到鄭伊健謝票時騷肌,志偉笑說:「我除褲添啦,真係㗎咩。」

嘉樂被成龍、洪金寶、袁和平、元彪大讚是接班人,錢嘉樂笑說:「真係諗唔到,佢哋四個同一時間讚一個人,壓力好大,係我中秋節、亦可能係我一生最好嘅禮物,唔知係咪志偉搞出嚟。」曾志偉笑說:「佢哋四個好口密,佢哋自發,證明佢哋好錫佢。」錢嘉樂指若果開續集由他做導演希望志偉繼續做監製。

圖1:有料!
圖2:錢嘉樂諗唔到,佢哋四個同一時間讚佢,壓力好大!
圖3:係佢一生最好嘅禮物咁話~
圖4:佢哋呢日搞電影慰勞宴!
圖5:今次掂晒!