2018-09-22 【蘋果日報】【專訪世界拳王】為《黃金兄弟》出山拍打戲 60歲周比利難忘星爺搞gag

瀏覽次數:25

熟悉八、九十年代港產片的,必定認識周比利。他身型魁梧但動作敏捷、表情不多但極之搶鏡,通常開口唔埋幾句便郁手郁腳,好像沒有他的出現,便突顯不出主角有幾威幾勁。外號「老虎仔」的他,今日已年屆六十,依然龍精虎猛,最近演出錢嘉樂執導的《黃金兄弟》,與同樣健壯的倉田保昭過番幾招,拳來拳往不讓後輩。這天拜訪Billy的拳館,只見他稍稍用勁便將沙包打飛,「世界拳王」名不虛傳且寶刀不老。

年輕一輩或未聽聞Billy威水事蹟,他曾是自由搏擊拳手,85年更贏得輕中量級自由搏擊世界冠軍。揚威國際後,卻因為一次機緣而踏足影壇,Billy說:「我入行最多謝都係洪金寶導演,佢拍攝《過埠新娘》,咁啱去到我住嘅加拿大Edmonton度拍,佢問我有冇興趣試下,仲話帶咗好多菲林可以畀我嘥!」其時武打片流行,Billy又愛接受新挑戰,二話不說答應,結果闖出另一番事業:「有啲武師問我係咪簽咗大哥,我話唔係喎,咁掂啦好多人想搵你拍呀,於是留咗喺香港發展。」

坊間有說Billy是影壇「最揍得」之人,曾與他過招的巨星不計其數,也是Billy拍戲最有滿足感的一環:「最好打嗰啲都同我打過啦!個個有唔同風格,好似元彪哥個啲輕巧啲,你要捉佢個時間;成龍大哥鍾意有少少亂;洪導演要靚、要勁 、要硬。有陣時要真係踢落去,都戥佢辛苦!」事實上,當年拍戲拳拳到肉,受傷是例牌:「打到咁上下,啲大哥就話呢腳你認真o趙落去啦!就佢係害佢,踢多幾次喳!」要數最多人記得的武鬥場面,除了與李連杰在《精武英雄》的對打外,便是《賭俠II上海灘賭聖》中,被周星馳用奪命鉸剪腳夾死,Billy笑說:「周星馳成日搞笑,佢叫我畀啲打拳帶佢睇,咁就請我拍戲,又話我唔畀新嘢下一套就唔搵我!佢嘅動作反應都幾好。」

對上一次拍戲,已經是十多年前,Billy今次出山純粹為過戲癮,拍攝時也沒有任何壓力。問到今日與昔日動作片的差異,他說:「我諗睇下邊個武術指導啦。(o依家)輔助嘅嘢多咗,但舊派個啲,咪仲係拳腳多啲。你睇吓錢嘉樂導演呢套《黃金兄弟》,我同倉田San打十幾個動作,一個鏡頭過,動作都好犀利。」

畢竟是世界拳王,Billy閒時亦會返拳館教拳作育英才,生活寫意。在擂台上縱有敗績,但未嘗被KO,只因自細捱得苦,當年出道時更有「鐵面具」之稱。當今世上就只有一人能降服他,Billy甜絲絲的說:「我太太就係事頭婆,我去邊度都要帶埋佢囉!」鐵漢柔情大抵如此。