2018-05-27 【壹週刊】【當前世情人出現】錢嘉樂同餅印女組「錢家band」 張家輝個女唔驚走失

瀏覽次數:55

阿女係老豆嘅前世情人!尤其係啲女生到同爸爸餅印一樣,叫啲老豆點樣唔溶化吖?

霍啟剛同晶晶個一歲B女,橫睇掂睇都冇忽似晶晶,反而似晒霍啟剛,好彩B女白雪雪又眼仔碌碌,一樣咁靚女。望落仲有幾分似「最美麗嫲嫲」朱玲玲添呀!

至於影帝張家輝同關詠荷個女Brittany ,眨下眼就12 歲,由出世到而家,Brittany 都同張家輝餅印一樣,真係唔驚會走失!仲有鍾嘉欣同Jeremy 嘅寶貝女Kelly ,出世嗰陣簡直同爸爸倒模一樣。不過Kelly 唔知係咪對得阿媽多,大大下似返嘉欣BB,絕對係小美人黎架!

講到「前世情人」,點少得鄭中基個女。而家五歳嘅大女Emma ,五官似足鄭中基,尤其係對眼。Emma 出世之後,鄭中基開始修心養性,為咗個女戒煙戒粗口,父愛真係唔講得少架!一樣「有女萬事足」嘅錢嘉樂,兩個囡囡都同佢倒模一樣,仲比網民笑佢父系基因太強。唔止個樣似呀!大女錢凱晴人仔細細已經遺傳daddy 媽咪嘅演藝細胞,識同老豆夾band ,不知幾有天份!